- Anzeige -

Wafrös alemannische Dialektik vom 3. November 2010

| Wafroe

Wer hett au des denkt, wo anno 2000 am 2. November, de amerikanische Kommandant und sine zwä russische Kollege mit ihrem Raumschiff bi dere ISS glandet sind, dass seither, also 10 Johr lang andauernd Aschtronaute uf dere ISS Wared. Guet sie wared kone zeh Johr do dobe, sie hond enand abglöst. Me isch it wäniger als 58 mol zu dere Raumschtazion gfloge und s wared fascht 200 vu däne Aschtronaute, wo i däne zeh Johr dobe wared. Damit aber etz it wieder ä paar Leser/ine mule kännted, weil se it wissed, wa die ISS isch, weil se bisher all nu vu de SS gläse hond, sott me doch nomol wäng erkläre. Also die ISS isch die internazionale Raumschtazion und die isch 380 km iber unsere Erdkugel. Do koscht on Tag 27 Millione Euro, aber des rentiert sich, ob-wohls sicher sottige giit, wo do anderer Meinung sind. S wird heisse, wa hond mir do dobe verlore, s wär gschieder, sie däted druf luege, dass se do hunne mit-enand gschirre kännted. Des isch au it falsch, aber de Mensch isch eifach dra in-tressiert, wa usser unsere Welt no alls do isch. S ka uns jo it gliichgültig lo, ob it am End no andere Welte do sind und zwar bewohnte. Uf omol kummed Milliar-de so kläne grüene Männle vume Planet und mached bi uns alls hii und uns no dezue, no hettemer s letzscht mol gschisse. Etz wo mir aber do dobe rumflieged, ka uns nix bassiere, äbe weil mer ufbassed, zum Beischpiel i dere bemannte Raumschtazion ISS. Sie isch unseren Ausseposchte im Weltraum. I mecht etz it no ufzelle, wa mir alls scho griegt hond eifach als Näbeprodukt vu de Raumfahrt.
Do sind it nu Russe, Amerikaner und sogar Deitsche an Bord, s hot en Wohnteil und drei Labor i dere ISS und miteme Space shuttle des isch ko Schpatzeschuttle wie mol ä Mundartkollegin gmont hot, weil mer des Schpeisschattel schpricht, und des isch so äbbes wie ä Taxi vum Raumfahrt-Bahnhof ufe zu dere Raumschtazion. Zämme mit some Raumtransporter isch des Ding 88 Meter lang und 45 Meter hoch. Mi wunderet alleweil, dass so ä Riesekischte it obe abe keit, dass die am Himmel hebt wie anebäbbt. Do dobe sind die Leit, wo i dere oder uf dere ISS schaffed, also die Wisseschaftler, die sind do schwerelos. Do kasch it laufe, do mosch de bewege, wie en Engel, blos hosch kone Fligel und i ka au it genau sage, wie sich Engel beweged, weil mer Engel bi uns selte sieht. Etz mond die Aschtronaute nadierlich au esse und do koschtet en Tag fir so en schwerelose Mensch runde 350 Euro. Wenn die ä Guckel Mandarine hetted und däted it saumässig obacht gäe, no däted die gäle Böllele i de ganze Schtazion umenandfliege und sie hetted die gröscht Arbet, bis se die Dinger wieder eigfange hetted. D Amerikaner hond meischens Gfriertrocknetes i Plaschtikbei-tel. Mitere Nodel kunnt Wasser dezue. Denn wird de Beitel knätet und me macht en warm im Ofe. Fertig sind Schpaghetti Bolognese, die wäred us de Folie gsuggelet. D Russe bringed Konservedose mit, des Fertigesse sieht zwar aus wie Hundefutter, schmeckt aber und me kas mit Messer und Gabel esse. Sie tausched s Esse au mitenand und wenn die unde am Bode mitenand so läbe däted, wie obe i dere Raumschtazion, no gingâ's de Menschheit wesentlich besser. Abgsäeh devu, i wär am liebschte au uf dere ISS, weil mer do hunne etz grad en Hufe verleidet isch, aber no lieber wär merâ's, wenn andere dobe wäred und nume abe kämed. Uf alle Fäll dank i etz allene mine Leser, wo iber fimfezwanzg Johr mit mir alemannisch gmacht hond. Des war heit mei letzschte Dialektik. It weil i altersschwach bin, nei i kännt scho no, aber i will nume. S hot nadierlich sine Gründ! Me moss manchmol im Läbe konsequent si, suscht dät me sei Gsicht verliere. Nomol allene Dankschön und vergässed au nie unser schäs, heimeligs Alemannisch!

Wochenblatt Redakteur @: Walter Fröhlich

| Wafroe