Wafrös alemannische Dialektik vom 8. November 2000

Aber etz hört denn doch bald alles uf. Mir hond doch no glernt, dass de Herr Gott us Staub vum Erdbode de Mensch gebildet hot. Denn hot Er ihm de Lebenshauch i d Nase blose, denn war de erschte Mensch, de Adam, fertig. Denn hot Er alle Tierle gmacht und d Vögele und hot se dem Adam zuegführt, dass der ihne de Name gäe hot und so hond se denn gheiße. Z letscht hot de Herr Gott de Adam eischlofe losse, hot ihm ä Rippe us em Rucke gnumme und die Schtell wieder zuegmacht. Us dere Rippe hot de Herr die Eva gebildet, des war die erscht Frau. So homer's doch glernt oder it? Aber etz grad drillet se alles um und wenn de am Morge dei Zeitung liesesch, no känntsch se grad glei i de Ofe werfe, aber mer hot jo kon meh, wemer Zentralheizung hot. Etz isch do kirzlich im Blättle gschtande, dass die schprichwörtliche Urahne vum Mensch, de Adam und d Eva, dass die sich noch de jingschte Erkenntnis nie begegnet seied. Des het ä internazionales Forschertiim usekriegt. De genetische Urvadder vum Schlag Homo Sapiens hett ugfähr 84000 Johr schpäter glebt als die genetische Eva. Die weibliche Vererbungslinie ging uf ä Frau, also uf d Eva z'ruck, wo vor 143000 Johr z Afrika glebt hot, und die hett ihre genetisches Profil iber unzählige Generazione weltweit ausbreitet. Ho etz losed emol so en Schwachsinn a. Do wird doch ä Sau no i de Pfanne verruckt. Die solled mi doch endlich mit ihrem ganze Gen-Scheiß in Schueh blose und uf d Kirbe kumme, wenn it no ebbes ganz anders. Wie soll denn die ihr genetisches Profil uf de Welt verbreite, wenn se kon Adam hot, won'ere Butzele macht, hä? Des kunnt all's nu vu dere blede Emanzipazion, wo se etz grad saumäßig stolz druf sind, dass d Wiiber au bi de kämpfende Truppe Dienscht mache derfed und it nu Händ und Füeß verbinde oder Marschmusig mache. Etz isches soweit, dass de Maa z letscht kumme isch und it d Frau. En Dreck en alte! Zerscht war de Adam und denn hot de Schef us onere vu dem sine Rippe d Eva gmacht und it umkehrt. Des hot bi uns bis vor kurzem jedes Kind gwisst. Drum hot au de klei Robertle zu de Modder sage känne: »Du Mamme, i glaub, i krieg ä Frau, mir duet's so weh a de Rippe!« Aber unsere Kind lerned jo nume d Bibel. Die mond etz lerne, wie mer im Internet umesörfet, und wemer hüt ä Mädele oder äBüeble frogt, ob's woss wa ä Bibel isch, no heißt's glei, des Wort sei bi ihre Softwär no nie vorkumme. Und iber allem schwäbt die sogenannte Wisseschaft, a die moss mer fescht glaube, obwohl morge wieder verloge isch, wa se heit verzapfed. So en Bledsinn! Also i hon i mim Läbe scho allerhand dumms Züg ghört und gläse, aber dass die Eva vor em Adam gmacht wore wär, des hot bis etz no niemerd behauptet. Wie soll denn die Eva entstande sei, wenn de Herr Gott ko Rippe vum Adam ghet hett, ka mer des mol en Wisseschaftler erkläre? Also wenn i Papst wär, i ließ alle Zeitunge uv de Index setze, dät se under schwerer Sündenschtrafe verbiete, bis ufs Konradsblatt, obwohl se dert au scho ufmucked und am Ratzinger rummäkeled. Hot die Welt scho mol so ebbes ghört, d Eva zerscht, dass i it lach!

Von Walter Fröhlich